रत्नागिरी : दी न्यू एज्युकेशन सोसायटीच्या आनंदीबाई प. अभ्यंकर बालकमंदिरात ३० ऑगस्टपासून गणेशोत्सवाला सुरुवात झाली. ढोल-ताशांच्या गजरात लाडक्या बाप्पाचे आगमन झाले.
लहान मुलांना भारतीय संस्कृतीतील सण-उत्सव कळावेत, त्यांच्यावर चांगले संस्कार व्हावेत या हेतूने शाळेत विविध सण साजरे केले जातात. लाडक्या गणपतीबाप्पाला आणताना मुलांनी लेझीमचा आनंद लुटला. खेळघर, तसेच छोट्या आणि मोठ्या शिशुवर्गातील मुलांनी यात भाग घेतला.
मुख्याध्यापिका मीना रिसबूड यांनी बाप्पांचे स्वागत केले. नंतर एका वर्गामध्ये रोषणाईसह सुंदर आरास करून बाप्पांची प्राणप्रतिष्ठा करण्यात आली. बाप्पांसाठी नैवेद्य म्हणून मोदकासह जिलबी आणि विविध गोडधोड पदार्थ आणण्यात आले. मुलांनी गणपती, शंकर आणि अन्य देवांच्या आरत्या तालासुरात म्हटल्या. मराठी गणपती स्तोत्र, श्लोक त्यांनी म्हटले आणि गणपतीचा नामजपही केला.